Tuhi Kau

Kua ngaro ngā niupepa reo Māori ō mua.
Ka hia tekau tau, heoi anō ā tātou niupepa Māori, he kongakonga kau e kōpipiri ana i waenganui i te tini kōrero Pākehā.

Ko te ao tēnei o te ipurangi, kotahi pēhanga i te pātene, kua tae atu ō kōrero ki tērā taha kē o te ao.

Nā konā i hou mai ai taku whakaaro, moumou kia kore tonu he niupepa reo Māori mā tātou.

Koia ko Tuhi Kau.

Otirā, he maha ake ngā painga o te niupepa ipurangi i ō te niupepa ‘pepa’ nei. E mea nei wētahi;

• Ki te hiahia koe ki te whakahoki i ngā kōrero, kāhore i te pērā i ngā niupepa o mua – kia pau rā anō te marama, kātahi anō ka puta. Kāhore. Heoi anō tāu, he whakautu tonu mai, ka rapa tonu atu.

• Tēnā pea he pātai āu e pā ana ki te aha rānei. Tukuna mai. Ko wai e mōhio, kei ngā kaipānui pea te whakautu.

• He whakapakari i te wairua whakawhanaungatanga i waenganui i ngā tāngata aroha ki te reo.

Tērā noa atu ngā painga, kei te mārama kau te kitea iho.

Erangi kia mōhio mai, horekau he kapa kotahi e hōmai ana hei huruhuru mō tēnei manu, nō reira, mā koutou, mā tātou, e whāngai ki te kōrero ka ora ai.

Nā Q.

p.s. (h.t. rānei – ‘he tāpiri’?) Tōna tikanga, ka TUHI KAU hou au i ia toru rā. Otirā, kei te Runga Rawa te tikanga (rāua tahi ko taku wahine).